قلقتني، أنا متأكد اني مكحتش، عينها كانت بتلمع بطريقة مخيفة، مقدرتش أرفض الماية، كنت عارف إنها من الخزان اللي قتلت فيه القطط، شربت بق صغير وناولتها الكوباية وقمت جري عالحمام جيبت كل اللي في بطني، رجعت كتير لحد ما نزفت دم، جت ورايا بنظرات كلها حقد، وقالت بصوت تخين : بنات الجن مش للتسلية واللعب زي بنات البشر، احنا مبنسامحش في الخيانة، وأنت خنت وخالفت العهد وده كان جزاءك، الانسية اللي فضلتها عليَّ ماتت وأنت مش هيطلع عليك نهار..
كنت بسمع كلامها وجسمي كله بيرتجف، عيني مبرقة فيها مش مصدق اللي بيحصل، نزيف الدم بيزيد وروحي بتتسحب مني، اترجتها تسامحني وتنقذني وارجعلها لكن ظهر جنبها جني بنفس شكلي وهيئتي وكأنها بتقولي أنها لاقت اللي يعوض وجودي بسهولة..
كنت فاكر علاقة البشر بالجن للمتعة بس، ومكنتش اعرف اني ربطت نفسي بعهد مفيش بعد مخالفته غير الموت …
